Yma galow ter rag sortya boghosekter fleghes yn Kernow ha Syllan.
Lewydh yeghes a lever bos seyth warn ugens mil flogh boghosek yn-dann nownsek bloodh.
***
Hembrenkyas parti Reform yn Kernow, Rob Parsonage, re gildennas.
An konsler re beu y’n y le a-dhia mis Me, pan waynyas y barti eth-le-warn-ugens y’n konsel y’n etholans.
Kynth o an brassa parti, nyns o possybel rewlya Kernow awos an parti LivWer hag Anserghyek dhe formya bagas.
***
Kowbal kadon ynter Kernow ha Dewnens a vydh gweythyes gans tredan kyns pell.
An nerth yw delivrys yn eur ma gans keunys menhesen …mes an towl yw dhe denna an kowbal gans nerth heb karbon.
Y teuth an arghasans rag an ragdres gans tri-hans-mil peuns dhyworth Governans Sen Stefan.
***
Ostel yn Tewynblustri a veu distruys gans tan y’n seythen yw passys.
Narrowcliff a loskas a-varr myttin Sul.
Gwag o awos bos anusys rag termyn hir.
***
Dell hevel, yma tommals a bombyons hevlena yn Kernow.
Perghenek bargen tir ogas hag Essa, Ashley Jones, a lever bos dhodho deg-warn-ugens-mil anedha war y dir, seyth kans erow y vraster.
***
Henn yw oll and seythen ma – y fydh moy Nessa seythen