Yma dout gans ragdres drehevel klavji nowydh yn Kernow rag Benynes ha Fleghes.
Yth esa towl y dhrehevel dhe Drelosk avel rann an dowlen rag klavjiow nowydh argemmynnys nans yw pymp bledhen gans an Governans Tori.
Meur a nowodhow a veu gwres pan dheuth Boris Johnson dhe’n klavji.
Dargenys veu kost an klavji tri-hans-saw-naw milvil peuns hag ambosys veu y worfenna erbyn dew-vil-eth-warn-ugens.
Yma dout gans pymp klavji nowydh warn ugens wosa Skrifenyas Yeghes nowydh, Wes Streeting, dhe lonchya daswel.
***
Yma own dhe byskadoryon yn Kernow awos towl dhe dhisplegya bargen-tiryow gwyns y’n mor a-derdro dhe’gan arvor.
Stat an Gurun a bew gweli an mor hag yma profyans war vappa nowydh.
Nebes an tylleryow a via gorrys yn ogas ha Syllan ha Penn an Wlas.
Pyskadoryon a grys an towl ma dhe dhistrui aga negys.
***
Gool Pasti Resrudh a veu dileys yn seythen yw passys awos hager awel.
Tewlys veu stallys, menestrouthi ha meur a voos hengovek – byttegyns an gewer o re euthyk yn myttin.
Yth esa livyow, taran, lughes ha glaw poos. Ray ha Denise Chubb eth dhe’n dre myttin Sadorn gans govenek dhedha a weles neppyth ow hwarvos…
<<RAY HA DENISE>>
***
Klavji Reunyon Gwig re solempnyas pennbloodh hanter-kansves y gottha reun.
Sheba a veu diskudhys gans pystigow gans Ken Jones mil-naw-kans peswardhek-ha-tri-ugens.
Yth esa klevesans lagas dhedhi – mes hi a wrug bewa deg-bledhen ha dew ugans wosa hy bos dyghtys.
Dre vras, reunyon a vew bys yn deg bloodh warn ugens.
Dell hevel, Sheba yw an kottha reun yn-dann with a bobel.
Awos henna, synsys veu kevewi rygdhi gans bagas brest ha tesen gwres a buskes ha rew.

• Ple’ma an gool an vledhen ma?

Y fydh yn Resrudh yn mis Hedra. Yma’n skol rag hwarvosow dons ha hweljiow, an eglos Wesley rag kescanow, an diwotti Resoghen rag  esedhogow ha neppyth nowydh rag an bledhen ma, an Buttermarket nowydh-ygerys rag boos hag ilow. An Buttermarket yw displegyans yntanus yn Resrudh – kresen rag boos ha gonisogeth ha lowen on nis bos ena rag an gool. Y fydh ynwedh barr dhe’n, ha pastiow ha krampothennow ena dhe wertha.

• Eus bagasdow dhyworth powyow Keltek erel?

Eus, yma bagas dons a dhyworth Kembra, bagas yowynk  dhyworth Alban an ‘ Ceilidh Trail’ hag bagas fest noz dhyworth Breten Vyghan gans kanoryon yn yeth Bretonnek, hag ynwedh ilow dhyworth Iwrdhon ha Mannow. Yma ynwedh kescan arbennek gans gwaryoryon Kernewek, Albanek ha Livonian.

• Pyth yw an kescan arbennek ma?

Kescan gans kanow yn Kernewek, Albanek ha Livonian yw, ow hwithra yethow minoryta hag aga kevrennow gans an bys naturel. Gwarioryon y fydh Laurie Huggett, Annie Baylis ha Tricia Salt a dhyworth Kernow (kevrenogyon y’n Annedhyans Yeth Kernewek Endelienta), Mischa McPherson dhyworth Alban hag Julgī Stalte dhyworth Latvi. Dres an gescan y fydh ynwedh an gynsa performyans dhe fylm berr nowdyh dhyworth askorrer David Bickley, ‘Dhuwow Koth’, gans bardhonieth yn Kernewek.

• Eus kescannow erel?

Eus, yma Kescan Hengovyow Seweni, gans gwarioryon yowynk dhyworth Kernow hag Alban, hag yn aga mysk gwrythyans dhyworth ‘Keuryow Yowynkneth Kernow’ gans kanow nowydh y’n yeth Kernewek.

• Eus neppyth aral y’n yeth Kernewek?

 Eus, yma gonis arbennek yn Kernewek ha Sowsnek dy’Sul myttin, gans gwarioryon dhyworth an gool, y’n eglos Wesley, ha ‘Shout dy’Sul’, y’ga mysk bagasow kepar ha The Oggymen hag Acapella Moonshine, gans kanow yn Kernwek ha Sowsnek.