An Radyo 010 – Éowyn

February 7, 2025 Matthew Clarke 2025 audio 0:58:05 Comments Off on An Radyo 010 – Éowyn

YMA Y’N DOWLEN MA

  • Nowodhow Broyow Keltek – Jerry Sethir
  • Éowyn – Nicholas Williams
  • Nowodhow an seythen

Kanow an seythen ma

  • “Hal an tow” – Changing Room
  • “Pagan Celebration” – Sue Aston
  • “March Arzur” – Dom Duff
  • “Double Jigs” – Kilfenora Ceili Band
  • “Peigi is Peadar” – Brian O hEadhra
  • “Hungan” – Tir ha Tavas
  • “Hyns tramm” – Kewbanda (Adam Wheeler)
  • “Domhwelyans” – Skwardya (Kan Beatles)
  • “Re a lever” – Bucca
  • “Bys Jenna” – Molly Biscoe
  • “Yntra diw enys” – Graham Sandercock

Nowodhow an Seythen

Yma kendon dhe Gernow moy es unn bilvil peuns lemmyn.
Y teu an nowodhow bos kudynnow mona dhe’n konsel wosa kans soodh dhe vos kellys – ha dew vil fardel tir.
Yma Kernow yn mysk an gwettha pymthek konsel yn Ruyvaneth Unys.
Pooster an begh a vydh war bobel ow tyllo tollow.
Konsel Kernow a vynnsa charjya pymp kansrann moy saw temmik.
***
Nasa re sinyas kevambos gans kowethas a garsa gul an downna poll y’n bys – yn Kernow.
Blue Abyss a vydh gorrys dhe Ayrborth Kernow rag trenya ha hwithrans efanvos.
Hanter-kans meter y dhownder a vydh an poll.
***
Ralli re beu synsys war an dreth dhe Heyl.
Protestoryon yw serrys awos bos kowethas ow kemeres dhe ves meur a dewes.
Yma own bos an ober ma ow tistrui natur an tewynnow.
Yma kummyas dhe’n kowethas kemeres an tewes dhe ves rag gwitha kanel igor dhe’n porth rag skathow.
***
Gwellheansow yw kowlwrys dhe hyns arvorek Kernow Gledh ynter or Kernow ha Tewynblustri.
An rann yw pymthek mildir ha tri ugens – hag yma towl dashenwel an hyns a-dro dhe Bow an Sowson – gans Kernow gorrys y’n towl na.
Natural England a garsa y henwel The King Charles the Third England Coast Path.
Heb mar, yma meur a bobel a-hys Kernow na vynn usya an hanow na.
***
Henn yw oll an seythen ma – y fydh moy nessa seythen

Nowodhow Broyow Keltek gans Jerry Sethir

Yn Kembra – Nowodhow BBC

Yma ansurneth y’n eur ma a-dro dhe dherivasow a’n kesstrif rygbi an ‘Hwegh Kenedhel’ yn Yeth Kembra. Yma chons may fydh an gwirvosow-darlesa chanjys ha martesen y fydh res dhe dus tyli rag gweles an fyttys. Mars yw henna an kas, yma dout a-dro dhe dhevnydhya Yeth Kembra rag leverel y’ga hever ha’n fyttys ow pos gwrys. Bys y’n termyn ma, an BBC hag ITV re gevrannas an gwirvosow mes an kevambos a vydh gorfenna y’n vlydhen ma hag y fydh res dh’y igeri orth profyansow rag darlesans dew vil hwegh warn ugens war-rag. Esel Senedh Kembra, Tonia Antoniazzi, yn-myst tus erell a vydh metya gans menester a-barth sportys Steph Peacock rag dadhlans a-dro dhe roweth an Yeth yn klappyans dre’n fyttys. Y leveris hi; ‘Rygbi yw dihaval yn Kembra, nivrow an wosolowysi yw ughella, yth yw rann vras a’gan gonisogeth – my a dyb Rygbi Hwegh Kennedhel dhe wodhvos hemma hag ymons i ow kul lies tra dhe witha a darlesans yn Yeth Kembra.’

Yn Iwerdhon – RTE

Tri theylu yn Dundalk yn Konteth Louth a vydh dos ha bos an kynsa dhe driga yn chiow drehevys dre bryntyans 3-myns, po ‘3D Printing’. An chiow a veu gwrys dre dhrehevel framweyth a-ugh an dor may fia drehevys an chiow hag ena jynn-kentevenn a ‘bryntyas’ fosow an chiow dre worra linennow hir a gentevynn herwydh towlenn gwithys yn jynn-amontya. Yma dhe bub chi dew leur gans braster kowal a gans ha deg meter pedrek. Res o saw dewdhek dydh rag pryntya an fosow (hag yw an rann yn unnik yw pryntys) ha hwegh mis rag kowlwul an drehevyansow gans to, prennweyth ha gonisyow. An ragdres yw siwyans a gesoberyans ynter Konsel Konteth Louth ha nebes kowethasow-drehevel. Drehevyans an fosow a veu gwrys a-dro dhe dri ugens kansrann skonna ages fordhow-drehevel hengovek, mes an kost yw a-dro dhe’n keth.

Yn Alban – STV

Esel Senedh Alban re bysis toll chi-karr rag difres tekter an ughdiryow hag an ynysow. Emma Roddick re leveris niverow a havysi dhe ‘dardha’ y’n blydhynyow a-gynsow ha kost an damaj ha gwask orth gonisyow teythyek dhe vos tylys gans tus teythyek. An fordh-havysi Arvor Pymp Kans re wrug ughelheans a hwegh warn ugens kannsrann y’n niver a vyajoryon ha chiow-karr yw keas ‘mes an toll yw gwrys y’n eur ma.

Yn Mannow – Mannow Hedhyw

Ros Laxey Meur, yn Mannow, yw an brassa ros-dhowr owth oberi y’n norvys ha trinos bras yw rag tus a wodrig orth Mannow, mes yma dadhlans y’n eur ma a-dro dhe gresenn-godrigor nowydh yw towlennys rag an tyller. Meyni orth an tyller a lever bos res drehevyans nowydh rag provia neb tyller yn-mes a’n gewer, mes desin profys an drehevyans nowydh yw kales gans nebes eseli an Tyndwald ow leverel desin ha’n tyller an drehevyans nowydh dhe shyndya ertach an ranndir. Profyans an towlenn a vydh lettys lemmyn rag gul kusulyans poblek.

Jerry Sethir, ow terivas a-barth An Radyo.