An Radyo 009

January 31, 2025 Matthew Clarke 2025 audio 0:57:59 Comments Off on An Radyo 009

YMA Y’N DOWLEN MA

  • Nowodhow Broyow Keltek – Jerry Sethir
  • Very – Nicholas Williams
  • Nowodhow an seythen

Kanow an seythen ma

  • “Pandr’a wrug hwarvos dhe Whitford?” – Hanterhir
  • ” ??” – Mammenn
  • “Vodya” – Gwenno
  • “Naw mab hardh” – Fool’s Rock
  • “Kernowes yn Pow Sows” – Elizabeth Ellis
  • “Dr MacPhail’s Trance” – Capercaillie
  • “Piw a wor?” – Brenda Wootton
  • “Ny allav y wodhevel” – Skwardya
  • “Oró sé do bheatha ‘bhaile” – The Dubliners
  • “Delyow Sevi / Hard Rock Miner” – Martha Woods

Nowodhow an Seythen

Yma sorr erbynn ledyores Konsel Kernow wosa hi dhe gewsel erbynn ervirans krev konseloryon war dhigresennans.
Linda Taylor a grys bos gwell dhe Gernow bos moy igor dhe geskowsow war gesunya Kernow gans Dewnens hag Aberplymm.
Ny wrug hi ragleva abarth nag erbynn kesunyans an mis ma.
Agensow, hi a dhuryas wosa raglevans war drest yn hy ledyans.
***
Deg milvil peuns warn ugens re bo gorrys yn Krofti Dheghow gans an Governans.
An mona a dheu dhyworth Arghas Rychys Kenedhlek.
Metalow Kernow a wra hwilas hwetek milvil peuns ha dew ugens rag pesya an hens war’tu ha dasigerans an bal.
Yma towl dastalleth gwaynya sten ena dew-vil-seyth-warn-ugens… ha dalleth tri hans soedh nowydh.
***
Ragdres Eden a vynnsa treghi peswar ugens soedh.
Rewloryon an biomow ogas dhe Sen Austell a lever bos moy kostek dhe witha an tyller ha bos le a bobel ow mos dh’y weles.
Nawnjek anedha a dhewisas dibertha a’ga govis.
***
Bagas a beswar person negys leel re gemeras rewlyans An Vorladron Gernewek.
Ledyes yns gans Martin Hudson neb o esel an bord.
Y fydh ganso Philip Champ, Anthony Whyte ha Lee Miles.
Sir Richard Evans re beu ow kontrollya an klub dres deg bledhen warn ugens.
Byttegyns, ev a leveris bos hwans dhodho kildenna nans yw teyr bledhen.
***
Henn yw oll an seythen ma… y fydh moy nessa seythen.

Nowodhow Broyow Keltek gans Jerry Sethir

Yn Kembra – Nowodhow BBC

Awtourita Park Kenedhlek Eryri a vydh an kynsa park kenedhlek yn Kembra dhe dhevnydhya nerthow gorrys yn lagha gans Senedh Kembra yn dew vil dew warn ugens dhe wul finwedh orth an niver a jiow nessa, po havosow, a-ji y’n park kenedhlek. Mar mynn nebonan devnydhya chi avel nessa chi, y fydh res dhe gavoes kummyas towl dh’y wul. Konsel Gwynedh o an kynsa korf poblek dh’y dhevnydhya. An Awtourita a leveris moy ages deg ha dew ugens kannsrann a dus deythyek dhe vos herdhys yn-mes an park gans prisyow chi ughel, hag yn nebes tylleryow an niver yw ogas peswar ugens kannsrann. Cymdeithas Yr Iaith, Kowethas Yeth Kembra re leveris bos hemma ‘kynsa gwreythres a-vri’ rag gwellhe kavadewder a jiow rag tus teythyek.

Yn Iwerdhon – RTE

An gewer a wrug an brassa nowodhow arta yn Iwerdhon. Yma oberennow ow pesya hwath dhe ewnhe damaj gwrys gans tewedh Eowyn. Yma bargenyow tir yn Dublyn ow klerhe temmigow a weder ha plastek wosa bos hanter-distruys kowfordhow plansa gans an gwyns, ha’ga threvasow re beu distruys gans gwynsow ughel ha tempuredh isel. Unn tiek a gollas dew a’y naw kowfordhow-plastek y’n gwyns. Yn Konteth Conaught a-dro dhe dhew kans gwydh a veu hwythys dhe’n dor ha kerri ha chiow a veu kisys. Keskomunyans yw pur gales hwath drefenn bos meur a wivrennow pellgowser hwythys dhe’n dor ha treuskorrellow klappkodh po kisys po heb tredan. Yth esa tus ha negysow owth assaya omdhaskavoes wosa ergh an diwettha tewedh a-varra y’n vlydhen.

Yn Alban – STV

Gwarior Hollywood, Harrison Ford, a vydh dos ha bos sterenn yn nebes fylmow berr gwrys rag argemmynna hwyski Albanek Glenmorangie. An gwarior yw aswonnys yn ta dre fylmow haval orth Star Wars hag Indiana Jones a vydh godriga orth an dystyllji yn Tain yn mysk dewdhek tyller a-dro dhe Alban rag gul an fylmow. Ford a leveris ev dhe omlowenhe dre wul an fylmow ha leverel i dhe vos anfayntek ha didhanus. Askorrer an fylmow, Joel Edgerton, a leveris: ‘Der ow bewnans oll my re viras orth argemmynnow a veu gwrys herwydh patron aswonnys, ytho, pur dha yw genev pan vo traow tamm goderrek, heudh hag anrevrond.’

Yn Mannow – Mannow Hedhyw

Yma tus yowynk ow pos gelwys dhe ombrofya yn kesstrif Piwasow Gwerin Mannow lemmyn. An hwarvos yw displegyans a ilow ha gonisogeth yn le kesstrif, ha fleghes yw kennerthys dhe wul neppyth y’n vlydhen ma a wra solempnya hengovyow powek ha honanieth gonisogethek gans thema a ammeth ha’n powdir. An kesstrif y honan a vydh pesya dre bymp dydh ha gwrythyansow a vydh diskwedhys yn Douglas ha Sen Jowan. An hwarvosow a dhalleth dhe’n ugensves a vis Meurth.

Jerry Sethir, ow terivas a-barth An Radyo.