YMA Y’N DOWLEN MA

• Nowodhow Broyow Keltek – Jerry Sethir
• And – Nicholas Williams
• Nowodhow an seythen
• ‘Golf’ – George ha Samantha

Kanow an seythen ma

• “Tekka ha hwekka” – Hanterhir
• “Yma o hyd” – Dafydd Iwan
• “Kan Kernow Divres” – Tir ha Tavas
• “Ev Chistr’ta, Laou!” / Dans Bro-Leon” – The Chieftains
• “Gas e” – Fiona O’Cleirigh
• “Dos a wra agan dydh” – Florence MacDonald
• “Dúlamán” – Clann Mhic Ruairí
• “Lavar gwir” – Skwardya

Nowodhow an Seythen

Gwav gwynn re dheuth dhe Gernow wor’tiwedh.

Kyn nag esa Nadelik gwynn dhyn ni, ergh a godhas yn feur rag mis Genver.

Rew kerri a veu stegys war an A-deg-warn-ugens dhe Jamaica Inn.

An yeynder a iselhas bys dhe boynt rew ha tredan a veu treghys yn TR5.

An gwav re weskis gonisyow yeghes ynwedh awos klevesow kepar ha fliw, kovyd, ha norawirus.

Trelosk a leveris y vos yn-dann woredhomm awos an myns a bobel ow kelwel naw-triflek.

***

Konseler Linda Taylor re skrifas dhe’gan hwegh esel senedh Sen Stefan yn unn wovyn keskows kler yntredha ha’n governans war dhigresennans.

Lyther a veu danvenys mis Gwynngala yw passys owth erghi kevambos rag Kernow yn unnik.

Byttegyns, an governans re leveris seulabrys bos hwans dhedha a worra awtoritas warbarth rag gul ranndiryow gans poblans brassa ages unn milvil ha hanter.

An styr dhyn nyni yw bos edhomm a gesunya Kernow ha Dewnens – ha dell hevel – nyns yw henna degemeradow dhe bobel a Gernow.

***

Spall a veu dyllys dhe lewyer karr wosa ev dhe vos gwelys yn kamera CCTV hag ev ow kasa atal.

Res yw dhodho tylli kans peuns ha hanter wosa seghyer MacDonalds ha hanav McFlurry dhe vos gesys ryb fordh ogas ha Sen Austell.

***

Kog a vri, Paul Ainsworth, re brenas Ostel Sen Enodoc.

An drehevyans a vir dres Dowr Kammheyl ogas dhe Garrek ha pur ogas dhe Dreth Daymer.

Ev ha’y wreg a vew boesti yn Lannwedhenek seulabrys – keffrys ha ostel y’n keth tre.

***

Henn yw oll an seythen ma – y fydh moy Nessa seythen.

Nowodhow Broyow Keltek gans Jerry Sethir

Kembra – Herald Wales

Kaskyrghow re wrug keskerdh yn Llambed (Lampeter) a-gynsow erbynn ervirans gans Pennskol Kembra Trynsys Sen Dewi dhe waya studhyansow denseth dh’y gollji yn Kaervyrdhyn (Carmarthen). An keskerdh a veu ordenys gans Kowethas Llambed hag y teuth studhyoryon dell yw ha grasedhigyon a’n termyn eus passys rag diskwedhes gorthter dhe’n dowlenn. Ieuan Davies, pennlywyer an keskerdh ha grasedhik a’n pennskol a leveris ‘Ni a vynn diskwedhes skoedhyans rag an studhyoryon a vydh effeythys aga adhyskans yn poran gans an towlennow ma, ha kovhe dhe’n dus a wra an ervirans ma a’n effeyth gwastyek a vydh hwarvos y’n erbysieth ha gonisogeth teythyek.’

Llambed yw an kottha pennskol yn Kembra, selys yn mil, eth kans, dew warn ugens.

Dasleans profys an asrann denseth re dhallathas prederow a-dro dhe sostenadewder a adhyskans ughella yn Llambed, ha kaskyrghow a lever an ervirans dhe worfenna istori a ertach akademik y’n dre a-dreus moy ages dew kans blydhen.

Iwerdhon – Irish Mirror

Yma’n gewer ow kul an brassa nowodhow yn Iwerdhon, hag ergh bras ha tempredhow mar isel avel marnas dewdhek degre a wra terroes a-dreus dew warn ugens konteth. Meur a skolyow yw deges, yth esa damaj gwrys dhe dhrehevyansow pals dre boesedh ergh ha nebes tus re beu ladhas dre dhroglammow daromres. Yn diwotti yn Konteth Kork, to a goedhas dhe’n leur yn-dann boester a beswardhek meusva a ergh ow kul damaj yw dismygrivys bos a-dro dhe gans mil euro. An to o anfast hag ysytynnadow dre jynnow tredanek, pan woderris an gewer euthek an nerth tredanek dhe’n diwotti nyns o galladow dhe ynplegya an to ha poesedh an ergh a’n herdhyas dhe’n leur.

Yma gwarnyansow an gewer yeyn hag erghek dhe besya dre’n seythun ma oll.

Alban – Nowodhow BBC

An gewer re wrug traow erell nebes moy heudh yn Alban. Yth esa ergh ha rew ha tempeuredh mar isel avel marnas deg degre, hag eseli an Muir of Ord Curling Club re beu owth omlowenhe dre dhevnydhya rewva yn-mes rag praktisya aga sport. Yth yw onan a’n diwettha tylleryow yn Ugheldiryow Alban may hyll tus praktisya ‘Curling’ yn-mes, ha nyns yw galladow lieskweyth fyttys yn-mes drefenn nag yw yeyn lowr an gewer, mes yn pennseythun yw passys yth esa fyt, henwys ‘bonspiel’, gans moy ages hanter-kans den ow kesstrivya. Yma govenek dhedha bos chons a fyttys moy mar pes an gewer yeyn.

Mannow – Isle of Man Today

Skol y’n soth a Vannow re solempnyas hy degves war ugens pennbloedh a-gynsow. Scoill Phurt Le Moirrey a igoras hy darasow rag dyskyblon dhe benn mil, naw kans, peswardhek ha peswar ugens hag yth esa saw peswar ha tri ugens flogh ena y’n kynsa dydh, ha teyr stevell. Yma nebes an meyni esa y’n skol yn hy hynsa dydh owth oberi ena hwath rag gul an solempnyans. Onan anedha yw Steve Sheppherd, an porther, ev a leveris, ‘Avel porther y’n skol ma, y hyllir skrifa roll a’n traow yw res aga gul y’n myttin hag ena y skwardya wor’tiwedh – nevra ny wodhor an traow a vydh dres gans an jydh! An dra yw an moyha a-vri yw bos sur bos puptra salow rag an fleghes; yma’n tappow oll owth oberi, oll a’n privedhyow yw glan ha’n mallborthow yw anlettys.

Jerry Sethir, ow terivas a-barth ‘An Radyo’.